Gal 1 | EMI | STEP | Aghi Pol, apostolo ieghi karika toa taumattu laghe sungieghila, me karika tee nim teva taumattu ghe suimatoongainaghila, ta Iesu Karisto me God Tamaita ia, ia ghe totuela tale nimate.

Galatians 1

1 Aghi Pol, apostolo ieghi karika toa taumattu laghe sungieghila, me karika tee nim teva taumattu ghe suimatoongainaghila, ta Iesu Karisto me God Tamaita ia, ia ghe totuela tale nimate. 2 Aghi me kapughu tau ngai kkaua ngakapa atoa la tokatoka teeieghi ami pitipiti aatu etaimim tale ale manga atoa tale provinsi eteva eGalaisia.

3 Maamasinaane me luei etaimim ekasukasu ta God Tamaita ia me Vau eteva Iesu Karisto. 4 Ghe tau mae sio maamauluaane tale kaluita ssavoto tani ghaa oghita tale nau etiulu oia sesaaili ia, nongina aloaloanaane Tamaita ateva ta God. 5 Ta ngetana nikkaua aue toka nau ekapa atoa, koronnaaili.

Karika mene teva masi kiukiu

6 Aghe soghieinamla va arovaea ta am ghe kasu vulila God ghe koloamla tale maamasinaane Karisto me ngam aimuli tee kasina ppae masi kiukiu, 7 llo karikaaili va masi kiukiu. Taataraane va katoa taumattu la ghe gheelei nannaaimim ange aisavisavila me la tootoonga tani aikolikolia masi kiukiuna Karisto. 8 Me arova ami o teva ensolo ngepona liu ghele ppooa masi kiukiu me karika elaolao aitaua tee llo ami ghe ppooaala etaimim, nikasikiena kanna God aue etoka etana. 9 Nongina ngami auliaala me ngamene aulia va, arova teva epoppooa masi kiukiu me karika elaolao aitaua tee llo ngam ghe ghaala, nikasikiena kanna God aue etoka etana.

10 Ia oia see aue ue va masi taumattu ieghi, taumattu ngatoa o God? Arova anim anna tani amasimasi taumattu ngatoa, karika arooroo tani kapuna tau ngai nongonongo anna Karisto.

Kiukiu vaalua God ghe kolola Pol

11 Aghanna, kapughu etoa, va am kila va masi kiukiu apoppooa karika va nim kiukiu taumattu ngatoa laghe gheleila, 12 me karika aghe ghaala ta nim teva taumattu, me karika toa laghe apasungaala etaghi, ta Iesu Karisto ghe apasungaala isaa o voto etaghi. 13 Ngam ghe nongola eleiaaghi tale nau too ang ghe lao sio tani usila eleiaaira aJiu etoa. Aghe uviuvi saasakia alena ale manga ateva God me aghe anna tani turungia. 14 Ngaghe muumuennaaili me kilakilaaili vaalua tani aimuli tee kakkauaaimami aJiu etoa. Eleiaaghi ghe laulau lo atoa aneimami ninamanama isaa aitaua me aghe sarasarakanaaili tani aimuli tee eleiaaira tuvuimami etoa. 15 Me nau Goto ateva, ghe suitoongainaghila nau aghe lutula me ghe koloaghila poli maamasinaane, ghe masimasila 16 tani apasunga Natuna etaghi me aue appooainia ta lo atoa karika aJiu ila. Isaa o voto karika aghe kolomila teva taumattu, 17 me karika aghe sae teela eJerusalem tani kolomi lo atoa tee taumattu laghe apostolo akasinala etaghi. Karika, ta aghe sso parasila eArabia vara me aghe mene lao sio eDamaskas.

18 Vara kotoluae ninamanama ghe ruula me aghe saela eJerusalem tani kila amasina Pita ^{▼▼1:18 PitaTale inangari nge Grik, Pol ghe pitilaKepas, ararina ateae Pita ta inangari nge Ibru.} me aghe toka teeiela kasangaulu ghalima (15) nau. 19 Karika aghe mene tarala teva apostolo nim Jeimis nonga, tue me nenga ilalua me Vau eteva. 20 Aghaulia ngakoronna etaimim tale taatarane God va voto apitipiti aatu etaimim karika va kamena. 21 Emulina aghe lao sio tale provinsi elua eSiria me eSilisia. 22 Oroieili ale manga eJiudia laghe aimuli tee Karisto karika laghe tara poila mataghi. 23 Laghe nim nongonongo kiukiu va, “Taumattu ngateva ghe tuuturungita, nau ghaine ange poppooa niaikaaia ngateva emua arau ghe anna tani turungia.” 24 Me laghe kkauaala God poli mausighi.